mánudagur, 21. júní 2021
 
TölublöðVenjuleg útgáfa

Ísfélagið kaupir Dala-Rafn

27. janúar 2014 kl. 08:08

Dala Rafn-Rafn VE (Mynd: Guðm. St. Valdimarsson)

Aflaheimildir eru tæp 1.600 þorskígildistonn.

Ísfélag Vestmannaeyja hf. hefur gert samning um kaup á öllum hlutabréfum í útgerðarfélaginu Dala-Rafni ehf. sem gerir út togbátinn Dala-Rafn VE 508. Báturinn var smíðaður í Póllandi árið 2007. Aflaheimildir félagsins á yfirstandandi fiskveiðiári eru tæp 1.600 þorskígildistonn.

Í frétt frá Ísfélaginu segir að kaupin séu liður í hagræðingaraðgerðum Ísfélags Vestmannaeyja hf., ekki síst í kjölfar sífellt aukinnar skattheimtu stjórnvalda á útgerðarfélög. Sú skattlagning sé komin út yfir öll mörk þess sem geti talist sanngjarnt og eðlilegt. Með kaupunum styrki Ísfélagið mjög veiðar og vinnslu félagsins á bolfiski.
Ísfélagið rekur fjölþætta fiskvinnslu í Vestmannaeyjum og á Þórshöfn. Félagið gerir út 6 skip og hefur eitt í smíðum í Tyrklandi.

Í fréttatilkynningu Ísfélagsins segir ennfremur:

„Það er mikið ánægjuefni að þegar eigendur Dala-Rafns ehf. ákváðu að hætta útgerð eftir tæplega fjögurra áratuga farsælan rekstur þá leituðu þeir til útgerðar í heimabyggð og lögðu kapp á að aflaheimildirnar og störfin færu ekki frá Vestmannaeyjum. Samstaða og viðhorf heimamanna skiptir öllu máli þegar standa þarf vörð um grunnstoðir atvinnulífsins á landsbyggðinni og þar með samfélagið allt.“

Ísfélag Vestmannaeyja hf. er elsta starfandi hlutafélag á landinu, stofnað1. desember árið 1901. Félagið er burðarás í atvinnulífi í Vestmannaeyjum og á Þórshöfn.