fimmtudagur, 14. nóvember 2019
 
TölublöðVenjuleg útgáfa

Íslensk síld til Síldarvinnslunnar

8. nóvember 2019 kl. 09:59

Margrét EA. Mynd/Smári Geirsson

Ekki ber á sýkingu í síldinni, en nánar verður kannað eftir löndun hvort síldin er hæf til manneldisvinnslu.

Margrét EA er á leiðinni til Neskaupstaðar með 860 tonn af íslenskri sumargotssíld og er gert ráð fyrir að skipið komi til hafnar í fyrramálið. 

Frá þessu er greint á heimasíðu Síldarvinnslunnar. 

Þar segir að síldin fékkst í fjórum holum utarlega í Jökuldýpinu um 80-90 mílur vestur úr Reykjanesi. Mun aflinn verða skoðaður þegar í land verður komið og kannað hvort hann er hæfur til manneldisvinnslu

Heimasíðan ræddi við Birki Hreinsson skipstjóra í morgun þar sem skipið var statt í brælu fyrir austan Vestmannaeyjar. 

„Við fengum 500 tonna hol seinni partinn í gær eftir að hafa togað í eina sex tíma. Áður höfðum við fengið tvö rúmlega 140 tonna hol og eitt 60 tonna. Við höfum séð mikið lóð á þessum slóðum en það er ekki allt síld, það virðist einnig vera um átu að ræða. Stundum reyndar sjáum við ekki neitt eins og í fyrradag. Við höfum nánast ekkert fengið á nóttunni og allur aflinn fékkst yfir daginn. Samkvæmt okkar skoðun er sáralítil sýking í þessari síld. Við urðum varir við sýkingu í örfáum síldum í fyrsta holi en síðan hefur ekkert borið á henni. Til dæmis virtist ekki vera um neina sýkingu að ræða í stóra holinu. Þetta varðandi sýkinguna kemur betur í ljós þegar í land verður komið og byrjað verður að skoða síldina ítarlega,“ segir Birkir.