mánudagur, 13. júlí 2020
 
TölublöðVenjuleg útgáfa

Kolmunnaveiðum að ljúka í færeyskri lögsögu

Gudjon Gudmundsson
19. júní 2020 kl. 13:23

Börkur NK á kolmunnaveiðum vestur af Írlandi. Mynd/Ólafur Óskar Stefánsson.

Skip Síldarvinnslunnar undirbúa makrílveiðar

 

Kolmunnaveiðum íslenskra skipa í færeyskri lögsögu er að ljúka. Bjarni Ólafsson AK landaði 1.500 tonnum í Neskaupstað í gær og í dag er Börkur NK að landa þar rúmlega 1.600 tonnum. Nú er Margrét EA eitt íslenskra skipa á miðunum og mun hún væntanlega koma fljótlega til löndunar.

Á heimasíðu Síldarvinnslunnar er rætt við Hjörvar Hjálmarsson skipstjóra á Berki. Hann var spurður hvort veiðin hefði verið orðin léleg.

„Já, veiðin vestur af Færeyjum, þar sem við vorum, var orðin afskaplega léleg en það mun vera ennþá eitthvað nudd norðaustur af eyjunum þar sem Færeyingarnir hafa verið að veiða. Allri kraftveiði er lokið í færeyskri lögsögu. Nú verður væntanlega ekki farið að hugsa um kolmunnaveiðar á ný fyrr en komið verður fram í nóvembermánuð,“ segir Hjörvar.

Næst á dagskrá hjá skipunum er makrílvertíð og er verið að undirbúa þau fyrir hana.