sunnudagur, 13. júní 2021
 
TölublöðVenjuleg útgáfa

Loðnuleit miðar hægt

6. desember 2011 kl. 12:44

Ingunn AK (Mynd: Jón Páll Ásgeirsson)

Veðurútlit slæmt og veiðivon því ekki mikil á næstunni.

Lítið hefur fundist af loðnu í veiðanlegu magni út af Vestfjörðum eftir að áhöfn rannsóknaskipsins Árna Friðrikssonar varð vör við álitlegar torfur af stórri og góðri loðnu á þessum slóðum í gærdag. Um fimm til sex skip eru nú á miðunum en þar sem veðurspáin er slæm má reikna með því að skipin verði að gera hlé á leitinni eftir kvöldið í kvöld, segir í frétt á vef HB Granda.

Meðal skipanna, sem verið hafa við loðnuleit, eru skip HB Granda, Ingunn AK og Faxi RE, en þau létu úr höfn á Vopnafirði sl. sunnudag. Að sögn Jóhanns Arnar Jónbjörnssonar, sem er 1. stýrimaður á Ingunni í veiðiferðinni, eru skipin nú stödd norðvestur af Hornbjargi.

,,Það vakti vonir þegar við heyrðum að Árni Friðriksson hefði í gær fundið góða loðnu í veiðanlegu magni en þótt það hafi orðið vart við loðnu í nótt, þá var hún mjög dreifð og á miklu dýpi. Grænlenska skipið Erika náði reyndar 50 til 60 tonna kasti í gær, fljótlega eftir að fréttirnar frá Árna Friðrikssyni spurðust út, en það bilaði eitthvað hjá þeim og skipið varð því að halda til hafnar,“ segir Jóhann Örn í viðtali á vef HB Granda. Að hans sögn eru skipin nú öll að leita á svipuðum slóðum.

,,Spáin er slæm og við höfum tíma fram á kvöld eða í mesta lagi fram á nóttina áður en það brælir að nýju. Ef spáin gengur eftir þá verður ekkert veiðiveður hér eftir þann tíma fyrr en um eða eftir næstu helgi.“