þriðjudagur, 28. september 2021
 
TölublöðVenjuleg útgáfa

Lundey NS í óhappi á Hofstaðavogi

29. október 2013 kl. 17:29

Lundey NS (Mynd: Guðm. St. Valdimarsson)

Tók niðri og botnstykki fyrir asdik skemmdust.

Litlar skemmdir urðu á Lundey NS eftir að skipið tók niðri þar sem það var að síldveiðum á Hofsstaðavogi í Breiðafirði laust fyrir hádegi sl. sunnudag. Tvö botnstykki fyrir asdik skemmdust og smá dæld kom á svokallaðan kassakjöl. Skipið losnaði eftir að sjó var dælt úr kjölfestutönkum og er það nú á Akranesi þar sem beðið er eftir varahlutum.

Að sögn Karls Sigurjónssonar skipaeftirlitsmanns HB Granda á Akranesi eru aðstæður á Hofsstaðavogi mjög erfiðar fyrir skip með stórar nætur. Skipin hafa verið að veiðum í djúpum ál á milli lands og Purkeyjar, skammt utan við Kóngsbakka, en sitthvoru megin við dýpið grynnkar hratt. Skipverjar á Lundey voru að undirbúa fyrsta kast veiðiferðarinnar þegar óhappið varð og segir Karl það vera lán í óláni að nótin hafi ekki verið komin í sjó þegar skipið tók niðri. 

Karl reiknar með því að Lundey komist til veiða að nýju um næstu helgi.

Frá þessu er skýrt á vef HB Granda.