sunnudagur, 13. júní 2021
 
TölublöðVenjuleg útgáfa

Norðmenn láta smíða í Bangladess

5. apríl 2017 kl. 14:19

Tölvuteikning af nýja uppsjávarskipinu. (Mynd af Facebook síðu H. Östervold)

80 metra langt tog- og nótaskip fyrir röska tvo milljarða ISK

Útgerðin H. Östervold AS í bæjarfélaginu Austervoll í Noregi hefur samið við skipasmíðastöð í Bangladess, Western Marine Shipyard, um smíði á tog- og nótaskipi sem verður 80,3 metra langt og 17 metra breitt. Skipið mun kosta fullbúið 11,7 milljónir evra plús 50,2 milljónir norskra króna, en þetta gerir samtals 2,1 milljarð ISK. 

Frá þessu er skýrt á vefnum Kystmagasinet.no. Þar er nefnt til samanburðar að jafnlangt uppsjávarskip, Marlene S, sem smíðað var fyrir aðra útgerð í Austervoll hafi kostnað 140-150 milljónir norskra króna þegar það var smíðað árið 2012 í Celiktrans skipasmíðastöðinni í Tyrklandi. Það jafngildir 1,8-2,0 milljörðum ISK á núverandi gengi. Tekið er fram að í Marlene S hafi verið sett notuð vél og annar notaður búnaður. 

Á vefnum þykir það athyglisvert að Celiktrans eða einhver önnur tyrknesk skipasmíðastöð skuli ekki hafa valin að þessu sinni, en hönnuður skipsins er Sawicon sem teiknað hefur mörg skip sem smíðuð hafa verið í Tyrklandi. Ólíklegt þykir að ástæðan sé pólitískur órói og hermdarverk í Tyrklandi því stjórnmálaástandið í Bangladess sé ekki síður óstöðugt. Þess vegna þykir líklegra að samkeppni um verð hafi ráðið valinu. Skipasmíðastöðin er tiltölulega óþekkt í Noregi en hefur smíðað skip frá árinu 2000, m.a. fimm gámaskip og bílferju fyrir Dani, átta flutningaskip fyrir þýskt fyrirtæki og minni uppsjávarskip fyrir heimamarkað. 

Smíðatími skipsins er 23 mánuðir frá undirritun samningsins sem þýðir að afhendingardagur er 17. desember 2018.