föstudagur, 18. júní 2021
 
TölublöðVenjuleg útgáfa

Nýr eigandi að Optimar

3. júní 2015 kl. 11:53

Freyr Friðriksson og Guðmundur Jón Matthíassson fyrir utan höfuðstöðvar Optimar Ísland í Stangarhyl í Reykjavík.

Kaupandinn er Freyr Friðriksson, eigandi KAPP ehf. véla-, kæli- og renniverkstæðis

Freyr Friðriksson, eigandi KAPP ehf. véla-, kæli- og renniverkstæðis, hefur keypt Optimar Ísland ehf. Optimar Ísland framleiðir, selur og þjónustar kæli-, frysti- og vinnslubúnað frá Optimar Stetter og Hayvard MMC í Noregi sem og ísþykknivélar og tengd kerfi. Fyrirtækið er m.a. með hinar heimsþekktu OPTIM-ICE ísþykknivélar sem eru mjög vinsælar á alþjóðamarkaði. 

,,Optimar er mjög öflugt og vel rekið fyrirtæki á spennandi markaði sem tengist sjávarútvegi bæði til sjós og lands. Það eru klárlega mikil tækifæri framundan. Metnaður Optimar felst eins og áður í að bjóða traustan og áreiðanlegan búnað og tryggja öryggi og gæði á öllum kæli- og frystibúnaði sem við seljum. Félögin tvö, KAPP og Optimar, verða sameinuð á einhverjum tímapunkti sem mun þýða enn stærra og öflugra fyrirtæki á sviði véla- og verkstæðisþjónustu sem og í sölu á kæli- og frystikerfum. Fyrirtækið er ekkert án starfsfólksins og ég tel afar mikilvægt að það hafi ánægju af því að starfa áfram hjá Optimar eftir þessi eigendaskipti," segir Freyr Friðriksson, nýr eigandi Optimar.

"Heilsufarsástæður hafa knúið mig til að gera þessar ráðstafanir og selja Optimar," segir Guðmundur Jón Matthíasson, sem verið hefur meirihlutaeigandi í fyrirtækinu síðan 2003 og starfað þar undanfarin 22 ár sem framkvæmdastjóri.