fimmtudagur, 12. desember 2019
 
TölublöðVenjuleg útgáfa

Nýr og öflugur 30 tonna krókabátur

28. nóvember 2013 kl. 10:00

Ný Jónína Brynja ÍS.

Kostnaður í kringum 140 til 150 milljónir

Fyrsti 30 tonna báturinn, sem smíðaður er inn í krókaaflamarkið eftir að reglum var breytt, hefur verið afhentur eigendum. Báturinn kostar 140 til 150 milljónir króna. Hann rær með 48 bala og gæti veitt allt að 2 þúsund tonn á ári, að því er fram kemur í nýjustu Fiskifréttum.  

Útgerðarfélagið Jakob Valgeir ehf. í Bolungarvík fékk nú á dögunum afhentan nýjan Cleopatra bát frá Bátasmiðjunni Trefjum í Hafnarfirði.

Nýi báturinn hefur hlotið nafnið Jónína Brynja ÍS 55. Báturinn er 15 metra á lengd, mælist 30 brúttótonn og er í krókaaflamarkskerfinu. Jónína Brynja er af nýrri gerð Cleopatra 50 sem er sérhönnuð inn í nýlega breyttar reglur um stærðarmörk krókaaflamarksbáta. 

Aðalvél Jónínu Brynju ÍS er af gerðinni Yanmar 6AYM 911 hestöfl tengd ZF500IV gír. Rafstöð er 28kW frá Kohler. Báturinn er útbúinn siglingatækjum af gerðinni Furuno frá Brimrún.

Báturinn er einnig útbúin með vökvadrifnum hliðarskrúfum að framan og aftan sem tengdar eru sjálfstýringu bátsins. Báturinn er útbúinn til línuveiða. Línuspil er frá Beiti ehf og annar búnaður til línuveiða frá Stálorku ehf. Blóðungarbúnaður er frá 3X Technology. Ískrapavél er frá Kælingu ehf. Öryggisbúnaður bátsins kemur frá Viking.

Rými er fyrir 19 stk. 660 lítra kör í lest. Í bátnum er innangeng upphituð stakkageymsla. Þrír demparastólar eru í brú fyrir skipstjóra og háseta. Svefnpláss er fyrir fjóra í lúkar auk eldunaraðstöðu með eldavél, örbylgjuofni og ísskápi. Borðsalur er í lúkar.

Sjá nánar umfjöllun í nýjustu Fiskifréttum.