miðvikudagur, 13. nóvember 2019
 
TölublöðVenjuleg útgáfa

Nýttu sýndarveruleika við kaup á hátækni vinnslubúnaði

22. október 2019 kl. 13:35

Brim undirritar tímamótasamning við Marel um kaup og uppsetningu á hátækni vinnslubúnaði og hugbúnaði fyrir hvítfiskvinnslu fyrirtækisins í Norðurgarði.

Brim hf. hefur undirritað samning við Marel um kaup og uppsetningu á hátækni vinnslubúnaði og hugbúnaði fyrir hvítfiskvinnslu. Að sögn Brims mun það gera aðstöðu félagsins á Norðurgarði í Reykjavík að fullkomnustu vinnslustöð fyrir bolfisk á heimsvísu.

Þetta kemur fram í tilkynningu frá fyrirtækjunum. Þar segir jafnframt:

Áætlað er að nýja vinnslukerfið verði sett upp um mitt ár 2020. Kerfið felur í sér ýmsar nýjungar, þar á meðal öflugt gæðaeftirlitskerfi og nýjustu róbótatækni sem mun sjálfvirknivæða og straumlínulaga vinnsluna til muna.

„Við erum mjög ánægð með að taka þátt í þessu spennandi verkefni,” segir Sigurður Ólason, framkvæmdastjóri Marel Fish. „Þetta er sögulegur samningur sem mun gera snjallvinnslu í sjávarútvegi að veruleika”.

Marel kynnti lausnina fyrir stjórnendum Brim í sýndarveruleika vikuna áður en kaupin voru undirrituð. Í tölvuhermiveröld gátu forsvarsmenn Brim gengið eftir öllum stigum vinnslunnar. Sú innsýn nýtist stjórnendum við skipulagningu. Þjálfun starfsfólks mun einnig fara fram í sýndarveruleika þannig að vinnsla getur hafist strax að uppsetningu lokinni. Frá fyrsta degi mun starfsfólk Brims geta starfrækt búnaðinn.

Marel notar sýndarverkuleika í auknum mæli, bæði við framleiðslu, sölu og jafnframt til þess að hraða þróunarferlinu og draga úr kostnaði við uppsetningar fyrir viðskiptavini.

Meðal þess sem Brim hefur fest kaup á er háþróað pökkunarkerfi með tíu róbótahausum sem mun straumlínulaga allt pökkunarferlið. Jafnframt felur vinnslukerfið í sér þrjár FleXicut vatnsskurðarvélar ásamt tilheyrandi forsnyrtilínum og sjálfvirkri afurða dreifingu, auk þess sem Brim verður fyrst til að innleiða nýtt SensorX beinaleitarkerfi fyrir ferskar afurðir. Hugbúnaður verður í lykil hlutverki í nýja vinnslukerfinu, þar sem hann tengir tækin í hverju vinnsluþrepi hvert við annað og tryggir jafnframt rekjanleika gegnum allt vinnsluferlið.

„Við í Brim erum spennt og  hlökkum til að taka þátt í að búa til hátækni bolfiskvinnslu,” segir framkvæmdastjóri Brim, Ægir Páll Friðbertsson. „Starfsfólk Brim býr yfir mikilli þekkingu og reynslu á vinnslu og meðferð sjávarfangs sem mun nýtast í þetta verkefni. Brim var útnefnt Umhverfisfyrirtæki ársins 2019 enda leggjum við í öllu okkar starfi áherslu á umhverfismál, sjálfbærni og tækniframfarir og við teljum samstarf okkar við Marel í þeim anda. Brim ætlar sér að vera samkeppnisfært á alþjóðamörkuðum fyrir sjávarafurðir. Til þess þarf gott starfsfólk til sjós og lands, öflug skip og fyrsta flokks tækni og vinnslubúnað. Við lítum framtíðina björtum augum.“

Marel hefur undarfarin misseri unnið að því að greina kolefnisfótspor lausna sinna gegnum allan lífstíma þeirra. Byggt á innsýn þeirra greininga mun Brim geta kolefnisjafnað starfssemi sína bæði hvað varðar kolefnisfótspor vinnslunnar og einnig kolefnisfótspor sem verður til við framleiðslu búnaðarins áður en hann er settur upp í Norðurgarði.