föstudagur, 22. nóvember 2019
 
TölublöðVenjuleg útgáfa

Portúgalskir kokkar kynna saltfisk í heimalandinu

29. nóvember 2017 kl. 11:24

Roberto Almeida, eigandi veitingastaðarins Bacalhau Afins, og kokkurinn Diogo Pires. Mynd/Íslandsstofa

Eru fulltrúar Íslandsstofu úti á markaðnum í framtíðinni, haldi á lofti merkjum Íslands og efli kynningu á íslenska þorskinum.

Tveir Portúgalar frá veitingastaðnum Bacalhau Afins í Aveiro komu til landsins fyrr í þessum mánuði til að kynnast veiðum, saltfiskvinnslu og landinu almennt. Þetta voru þeir Roberto Almeida, eigandi veitingastaðarins, og kokkurinn Diogo Pires, en veitingastaðurinn býður upp á íslenskan þorsk og sérhæfir sig í fjölbreyttum réttum, bæði hefðbundnum og óhefðbundnum saltfiskréttum.

Frá þessu segir á heimasíðu Íslandsstofu. Þar segir:

Markmiðið með heimsókninni var að þeir starfi sem fulltrúar Íslandsstofu úti á markaðnum í framtíðinni, haldi á lofti merkjum Íslands og efli kynningu á íslenska þorskinum. Heimsóknin tengist markaðsverkefni fyrir saltaðar þorskafurðir sem Íslandsstofa sinnir í samstarfi við söluaðila og framleiðendur á söltuðum þorski.

Þessa daga á Íslandi heimsóttu þeir m.a. Húsavík og fengu að upplifa alvöru íslenskt vetrarveður. Farið var í saltfiskvinnslu og um borð í línuskip en þannig gafst þeim tækifæri á að sjá með berum augum hvernig þessi gæðaafurð verður til. Um kvöldið var slegið upp veislu á veitingastaðnum Naustinu þar sem Portúgalarnir elduðu saltfisk og þorskrétti í samstarfi við íslensku kokkana Guðbjart Fannar Benediktsson frá Sölku restaurant og Hrólf Flosason hjá Fosshótel Húsavík. Þetta samstarf kokkanna mæltist vel fyrir og hafa íslensku kokkarnir mikinn áhuga á að gera saltaðan þorsk sýnilegri á matseðlum á Húsavík.

Þeim Roberto og Diogo gafst einnig kostur á að kynnast íslenskri náttúru í ferð sinni, auk annarri matvælaframleiðslu, s.s.  s.s. tómataframleiðslu, rúgbrauðsgerð og framleiðslu á sjávarsalti. Heimsóknin tókst mjög vel í alla staði og voru þeir duglegir að miðla upplifun sinni af Íslandi á samfélagsmiðlum.