mánudagur, 21. júní 2021
 
TölublöðVenjuleg útgáfa

Seðlabanki Íslands staðfestir að DFFU sé ekki til rannsóknar hjá bankanum

8. febrúar 2013 kl. 11:11

Baldvin NC, eitt skipa DFFU (Mynd: Þorgeir Baldursson)

DFFU krefst þess að Seðlabanki Íslands skili án tafar öllum gögnum fyrirtækisins sem bankinn tók við húsleitir á Íslandi í mars 2012

 

Seðlabanki Íslands staðfestir í svarbréfi til Deutsche Fischfang Union GmbH & Co. KG (DFFU), sem er í eigu Samherja, að félagið tengist ekki á nokkurn hátt málum sem bankinn sé með til rannsóknar, að því er fram kemur á heimasíðu Samherja. Í ljósi yfirlýsingar Seðlabanka Íslands krefst DFFU þess að bankinn afhendi félaginu þegar í stað öll skjöl og tölvuskrár er hann hafi undir höndum og varða starfsemi DFFU.

Þann 27. september 2012 sendi lögfræðingur Deutsche Fischfang Union GmbH & Co. KG. (DFFU) fyrirspurn til Seðlabanka Íslands vegna þess að gögn er varða félagið höfðu verið tekin við húsleitir á Íslandi en félaginu hafði hvorki verið gert viðvart um að það sætti rannsókn af hálfu bankans né heldur hefði það verið upplýst um gang rannsóknarinnar.

Í svarbréfi til lögfræðings DFFU frá Seðlabanka Íslands, dagsett 30. janúar sl. en barst DFFU þann 6. febrúar sl., er kveðið skýrt að orði: „Til þessa dags hefur umbjóðandi þinn ekki tengst neinum málum sem Seðlabanki Íslands hefur til skoðunar og gæti lokið með íþyngjandi stjórnvaldsákvörðun.“

„Þetta eru mjög ánægjuleg tíðindi. Með bréfi Seðlabanka Íslands er staðfest að DFFU er ekki til rannsóknar hjá bankanum. Við munum tilkynna viðskiptavinum okkar þessa niðurstöðu en jafnframt krefjumst við þess að Seðlabanki Íslands skili án tafar öllum þeim gögnum fyrirtækisins sem bankinn tók við húsleitir á Íslandi þann 27. mars 2012,“ segir Haraldur Grétarsson, framkvæmdastjóri DFFU, í frétt á heimsíðu Samherja.

Sjá nánar http://www.samherji.is/is/frettir/sedlabanki-islands-stadfestir-ad-dffu-er-ekki-til-rannsoknar-hja-bankanum