föstudagur, 14. ágúst 2020
 
TölublöðVenjuleg útgáfa

Skipasmíðar áberandi á Sjávarútvegssýningunni 2020

7. febrúar 2020 kl. 13:15

Frá Sjávarútvegssýningunni 2017. Mynd/Sjávarútvegssýningin

Alþjóðlegum sýnendum fjölgaði um 41% árið 2017 og þessi þróun heldur áfram.

Sjávarútvegssýningin IceFish hefur þróast frá því að vera staðbundinn viðburður í Reykjavík árið 1984 í að verða alþjóðlegur vettvangur sem endurspeglar breyttar kröfur íslenskrar útgerðar og markaðarins í heild.

Marianne Rasmussen-Coulling, viðburðastjóri hjá Mercator Media, segir að í upphafi hafi fyrsta sýningin komist fyrir á 5.000 fermetra svæði og meirihluti sýnenda voru innlend fyrirtæki.

„Þetta er gjörólíkt nú þegar viðburðirnir 2017/2020 ná yfir 13.000 fermetra sýningarpláss og sýnendurnir koma alls staðar að úr heiminum,” segir hún.

Alþjóðlegum sýnendum fjölgaði um 41% árið 2017 og þessi þróun heldur áfram með mikilli þátttöku frá spænskum fyrirtækjum á þessari sýningu.

„Við verðum einnig með landsbása sem Danmörk, Noregur, Færeyjar, Bretland og Kanada sjá um skipulagningu á. Í fyrsta sinn verðum við með spænskan þjóðarbás þar sem skipasmíðastöðvar verða mest áberandi: Armon, Astander, Balenciaga, Foro Maritimo, Murueta, Ferri, Gondan og Zamakona verða með sameiginlegt sýningarrými, auk þess sem Ibericisa og Nodosa verða með sérrými.”

Skipasmíðar verða áfram áberandi á sýningunni.  Skipasmíðastöðvar frá Spáni, Tyrklandi, Danmörku, Póllandi og Litháen hafa nú þegar skráð sig til leiks.

„Eftir langt tímabil lítilla fjárfestinga í tonnum talið, af ýmsum ástæðum, þá varð skyndilega gífurleg fjölgun nýrra skipa sem bættust í flotann um svipað leyti og IceFish-sýningin 2017 var haldin. Þótt hægst hafi á þessari fjölgun er langt frá því að henni sé lokið,” segir hún.

„Nú þegar við stefnum á IceFish 2020 er enn pláss fyrir endurnýjun í íslenska flotanum, nokkur skip eru í smíðum, meðal annars hjá Karstensen í Danmörku og Armon á Spáni. Evrópskar skipasmíðastöðvar átta sig á þeim tækifærum sem gefast á IceFish til að vera með kynningar fyrir sjávarútvegsgeirann, bæði almennt við Norður-Atlantshafið og sérstaklega á íslenska markaðnum.”