mánudagur, 9. desember 2019
 
TölublöðVenjuleg útgáfa

Skráning Brims í norsku kauphöllina verði skoðuð

3. desember 2019 kl. 16:01

Guðmundur Kristjánsson

Tillaga Útgerðarfélags Reykjavíkur hverfist um að fela stjórn Brims að skoða, og leggja fram tillögu fyrir aðalfund félagsins á næsta ári, um hvernig best er að auka möguleika erlendra aðila til óbeinnar fjárfestingar í félaginu.

Tillaga hefur verið lögð fram af Útgerðarfélagi Reykjavíkur um að skoðað verði að möguleg skráning Brims í norsku kauphöllina eða aðrar leiðir til að opna fyrir fjárfestingu erlendra aðila í fyrirtækinu.

Útgerðarfélag Reykjavíkur er eins og kunnugt er stærsti hluthafi Brims og í eigu Guðmundar Kristjánssonar, forstjóra Brims.

Viðskiptablaðið greinir frá þessum hugmyndum.

Þar segir að tillagan er í þremur liðum og felst í því að fela stjórn að skoða, og leggja fram tillögu fyrir aðalfund félagsins á næsta ári, um hvernig best er að auka möguleika erlendra aðila til óbeinnar fjárfestingar í Brimi.

Tvær tillögurnar eru ítarlega framsettar, annars vegar um að breyta tilgangi Brim úr sjávarútvegsfyrirtæki í eignarhaldsfélag sem eigi nýtt dótturfélag sem stofnað verði utan um sjávarútvegsreksturinn.

Hins vegar að stofnað verði erlent félag sem eigi 25% hlutafjár í íslensku félagi sem eigi svo aftur 100% í Brim, og erlenda félagið verði skráð í erlenda kauphöll, t.d. í kauphöll í Noregi.

Þriðja tillagan er að kanna og meta aðrar leiðir til að auka möguleika erlendra aðila á óbeinum fjárfestingum í Brim.

Segir jafnframt í frétt Viðskiptablaðsins að í greinargerð með tillögunni er bent á að hlutafé félagsins lúti takmörkunum um fjárfestingu erlendra aðila í fyrirtækjum sem stunda fiskveiðar og vinna sjávarafurðir hér á landi, upp að 25% (eftir atvikum 33%).

„Vegna reglnanna eru beinar fjárfestingar erlendra aðila í íslenskum lögaðila sem stundar fiskveiðar eða vinnslu hér á landi óheimilar og því kauphöllin meinað erlendum aðilum að eiga viðskipti með hlutafé í Brimi, eitt íslenskra aðila í kauphöllinni enda eina útgerðarfélagið þar. ÚR telur hins vegar áhuga vera til staðar hjá erlendum aðilum að fjárfesta óbeint í sjávarútvegi á Íslandi og segir Magnús Helgi Árnason formaður stjórnar ÚR að slík viðskipti yrðu til hagsbóta þar sem það geti aukið verulega getuna til fjárfestinga, eflt rekstur og skapað aukin verðmæti,“ segir í fréttinni.