laugardagur, 19. september 2020
 
TölublöðVenjuleg útgáfa

Skylt að koma með allan afla í land, líka lifur, hausa, hryggi og afskurð

21. júlí 2011 kl. 10:00

Á netaveiðum (Mynd: Einar Ásgeirsson).

Ný reglugerð frá sjávarútvegsráðuneytinu um nýtingu afla og aukaafurða

Sjávarútvegsráðherra hefur gefið út reglugerð sem skyldar útgerðir til að koma með allan afla að landi, þ.m.t. lifur, hausa, hryggi og afskurð samkvæmt nánari reglum, að því er fram kemur í frétt frá sjávarútvegsráðuneytinu.

Við gildistöku reglugerðarinnar 1. september næstkomandi taka gildi ákvæði sem skylda útgerðir til að koma með að landi alla lifur sem til fellur. Skip sem vinna afla um borð fá þó árs aðlögun að þessu ákvæði, eða til 1. september 2012. Þá er við hrognkelsaveiðar hér eftir skylt að koma með öll hrognkelsi að landi.

Skipum sem vinna síld um borð skylt að koma með hausa af íslenskri sumargotssíld að landi líkt og verið hefur við makrílveiðar vinnsluskipa. Þá verður jafnframt skylda að koma með afskurð af karfaflökum líkt og verið hefur með bolfisk.

Frá og með 1. febrúar 2012 er skipum sem vinna afla um borð skylt að koma með 50% af öllum þorsk-, karfa- og grálúðuhausum að landi. Frá og með 1. september 2012 verður skylt að koma með alla hausa og hryggi sem til falla um borð í vinnsluskipum að landi.

Reglugerðin nú er sett í framhaldi af skýrslu sem unnin var af starfshópi ráðuneytisins og ber heitið Bætt nýting bolfisks. Þar voru gerðar tillögur um aðgerðir í þá veru sem nú hafa verið festar í reglugerð.