mánudagur, 21. júní 2021
 
TölublöðVenjuleg útgáfa

Smábátar fái að veiða síldina utan fjarðar

3. janúar 2014 kl. 09:56

Smábátur á síldveiðum í Kolgrafafirði í desember sl. (Mynd: Alfons Finnsson):

LS vill að smábátakvótinn í Kolgrafafirði fáist nýttur annars staðar í Breiðafirði.

Landssamband smábátaeigenda (LS) vinnur nú að gagna- og upplýsingaöflun varðandi framhald síldveiða smábáta í Breiðafirði. Verði niðurstaðan jákvæð mun félagið krefjast þess að smábátar fái að nýta það sem eftir er af kvótanum sem þeir höfðu til veiða innan brúar í Kolgrafafirði á almennu veiðisvæði á Breiðafirði, segir í frétt á vef LS

Sem kunnugt er heimilaði atvinnuvegaráðuneytið hinn 22. nóvember síðastliðinn síldveiðar smábáta í firðinum, allt að 1.300 tonnum, á þeirri forsendu að veiðarnar gætu bjargað verðmætum. Rétt fyrir áramótin tilkynnti ráðuneytið að um frekari úthlutun í Kolgrafafirði yrði ekki að ræða en tekið fram að þær aflaheimildir sem þegar hefði verið úthlutað fram að þessu samkvæmt reglugerðinni í nóvember og kynnu að vera  ónýttar, héldu gildi sínu og yrði hægt að nýta þær þótt nýjum úthlutunum væri hætt. 

LS lýsir undrun sinni á því að Hafrannsóknastofnun skuli nú telja að síldveiðar í firðinum skapi  „óþarfa skark í stofninum“ sem „veldur því að síldin þarf sífellt að eyða meiri orku en ella sem getur haft áhrif á möguleika hennar að lifa af veturinn“.  LS bendir á að aðeins sé liðinn mánuður síðan smábátar hafi verið kallaðir til veiða þar svo bjarga mætti verðmætum.