mánudagur, 13. júlí 2020
 
TölublöðVenjuleg útgáfa

Starfsmannaslútti frestað til öryggis

30. júní 2020 kl. 12:54

Fiskvinnslustöð Síldarvinnslunnar á Seyðisfirði. Mynd/Ómar Bogason

Vinnsla í frystihúsi Síldarvinnslunnar á Seyðisfirði hefur gengið ágætlega það sem af er ári, þrátt fyrir truflanir vegna kórónuveirufaraldursins.

Framleiðsla í frystihúsi Síldarvinnslunnar á Seyðisfirði hefur gengið ágætlega það sem af er ári. Búið er að taka á móti 1.200 tonnum af hráefni og að mestu þorski. Kórónuveirufaraldurinn hefur sett sitt mark á vinnsluna eins og annar staðar en sumarstopp hefst á morgun.

Frá þessu er sagt í frétt frá Síldarvinnslunni. Klárað var að vinna afla úr Gullver í gær og stendur til að þrífa og gera húsið klárt fyrir stopp í dag. Einhverjir starfsmenn munu sinna viðhaldsverkefnum í sumarstoppi. Ráðgert er að framleiðsla hefjist aftur eftir verslunarmannahelgi.

Þar segir að hefð hefur verið fyrir því að hefja sumarfríið með starfsmannaslútti og átti það að vera síðastliðinn laugardag. Ákveðið var að fresta því og hafa frekar hátíð með starfsmönnum í haust ef aðstæður leyfa. Ástæða frestunnar var að sl. föstudag kom upp grunur á kórónuveirusmit þegar starfsmaður í frystihúsinu sem hafði glímt við veikindi var sendur í próf fyrir veirunni. Óvissa var um niðurstöðu sýnisins og því var ábyrga niðurstaðan að fresta veisluhaldi. Niðurstaða úr sýnatöku var þó neikvætt hjá umræddum starfsmanni.

Heimasíðan heyrði í Róberti Inga Tómassyni framleiðslustjóra.

„Framleiðslan hefur verið lituð af kórónuveirunni og höfum við þurft að aðalaga framleiðslu afurða að breyttri eftirspurn á mörkuðum. En sóttvarnir hafa gengið vel hjá okkur, við lokuðum á allar utanaðkomandi heimsóknir og breyttum verkferlum með það í huga að draga úr hættu á smiti. Framleiðsla afurða hefur gengið ágætlega hjá okkur mest er framleitt af þorsk, ýsu og ufsa. Það kom upp erfið staða fyrir helgi þegar starfsmaður okkar sem hafði glímt við veikindi var sendur í sýnatöku fyrir kórónuveirunni. Við ákváðum tafarlaust að það eina ábyrga í stöðunni var að fresta starfsmannaslúttinu fyrst ekki lá fyrir niðurstaða úr sýninu. Það var mikil eftirvænting og spenna fyrir slúttinu meðal starfsmanna og vonumst við til að geta boðið þeim upp á starfsmannaskemmtun í haust.“