miðvikudagur, 13. nóvember 2019
 
TölublöðVenjuleg útgáfa

Tæknin til staðar en gagnabankar flöskuháls

27. október 2019 kl. 09:00

Sjósýni tekin í leiðangri Hafrannsóknastofnunar. Mynd/Hafró

Á ráðstefnu um vöktun líffræðilegs fjölbreytileika með umhverfis DNA (eDNA) kynntu 13 vísindamenn frá Íslandi, Noregi, Danmörku, Færeyjum og Kanada eDNA rannsóknir sínar.

Tækni og aðferðafræði í eDNA rannsóknum eru langt á veg komnar. Það sem stendur helst í vegi fyrir framþróun aðferðarinnar er að viðmiðunar gagnabankar fyrir tegundir eru margir og upplýsingar í þeim ekki staðlaðar. Enn fremur eru upplýsingar sem þar er að finna oft á tíðum ekki sannreyndar.

Samræma þarf gögn

Þetta er ályktun sem samþykkt var á ráðstefnu um vöktun líffræðilegs fjölbreytileika með umhverfis DNA (eDNA) sem haldin var nýlega. Eins var ályktað að nauðsynlegt sé að koma á fót nýjum alþjóðlegum gagnabanka eða styrkja núverandi gagnasöfn svo upplýsingar um allar tegundir væru nákvæmari og altíð réttar.

Umhverfis DNA er erfðaefni lífvera sem finnst í umhverfinu en flestar lífverur skilja eftir sig erfðaefni í umhverfinu sem kemur frá dauðum húðfrumum, slími fiska og saur. Með því að taka sjósýni og greina það má fá mat á líffræðilegum fjölbreytileika vistkerfis án þess að lífverunnar séu truflaðar eða drepnar.

Samvinna lykilatriði

Á ráðstefnunni kynntu 13 vísindamenn frá Íslandi, Noregi, Danmörku, Færeyjum og Kanada eDNA rannsóknir sínar. Einn aðal tilgangur hennar er að mynda hóp vísindamanna frá Norðurlöndunum, Evrópu og Kanada sem vinna við eDNA rannsóknir og geta unnið saman í framtíðinni að framgangi slíkra rannsókna.

Ráðstefnan var styrkt af undirhóp Norrænu ráðherranefndarinnar AG-FISK sem fjallar um fiskveiðar og fiskeldi. Davíð Gíslason, sérfræðingur á Matís, og Christophe Pampoulie, erfðafræðingur á Hafrannsóknastofnun, skipulögðu fundinn. Ráðstefnan var opin og skráðu sig um 50 manns.