mánudagur, 21. júní 2021
 
TölublöðVenjuleg útgáfa

Þorskverð lækkar en ýsuverð hækkar

23. maí 2014 kl. 11:42

Þorskhnakki

Tölur fyrir útflutning á ferskum fiski fyrir fyrstu þrjá mánuði ársins.

Á fyrstu þremur mánuðum þessa árs hefur verð á ferskum þorskafurðum í útflutningi  lækkað um 4,3% í evrum talið en ýsan aftur á móti hækkað um 5,2%.  Vakin er athygli á þessu á vef Landssambands smábátaeigenda. 

Þar segir að verðlækkun í þorski valdi áhyggjum þar sem heildarmagnið hafi minnkað um 4% milli ára. Mestu munar þar um minni útflutning til Frakklands og Bretlands, en þær þjóðir kaupa mest af ferska þorskinum. Að sama skapi minnkar hlutdeild þeirra frá því að vera 69% á tímabilinu janúar til og með mars 2013 niður í að vera 55% í ár.

Útflutningur á ferskri ýsu fer að langmestum hluta til fjögurra landa, Bandaríkjanna, Bretlands, Belgíu og Frakklands.  Hlutdeild þeirra í heildarmagni helst óbreytt milli ára, en magnbreytingar nokkrar milli einstakra þjóða.  

Verðhækkun var góð á Frakklandsmarkað en að sama skapi hefur útflutningur þangað minnkað töluvert á fyrsta ársfjórðungnum. Útflutningur til Bretlands og Belgíu hefur aukist á tímabilinu án þess að það hafi komið niður á verði.   

Heildarútflutningsverðmæti fersks þorsks og ýsu á fyrsta ársfjórðungi þessa árs nam 6,2 milljörðum sem er lækkun um 12,4% frá sama tímabili 2013.