miðvikudagur, 23. október 2019
 
TölublöðVenjuleg útgáfa

Togarar Síldarvinnslunnar fengu gott ár

11. september 2019 kl. 14:00

Fiskur snyrtur um borð í Blængi NK. MYND/Hreinn Sigurðsson

Nýliðið kvótaár reyndist togurum Síldarvinnslunnar og dótturfélagsins Bergs-Hugins í Vestmannaeyjum vel. Aflinn var jafn og góður allt árið.

Þrír togaranna hafa aldrei aflað meira en á síðasta ári og afli fjórða skipsins var svipaður og árið á undan. Þrír togaranna, Gullver, Bergey og Vestmannaey, eru ísfisktogarar en Blængur NK er frystitogari. 

Síldarvinnslan greinir frá og í frétt á vef fyrirtækisins er birt tafla um afla togaranna bæði á nýliðnu kvótaári og árið á undan.

Arnar Richardsson, rekstrarstjóri Bergs-Hugins, segir að skip félagsins hafi fiskað meira í nánast hverjum mánuði á nýliðnu kvótaári en árið á undan. Hann tekur þó fram að Vestmannaey hafi verið frá veiðum um tíma vegna viðhalds. Þá segir hann að afli skipanna á nýliðnu kvótaári sé sá mesti í sögu Bergs-Hugins, en afli á kvótaárinu 2017-2018 hafi verið sá mesti áður. 

Rúnar L. Gunnarsson, skipstjóri á Gullver, segir að skipið hafi aldrei aflað meira en á kvótaárinu sem var að líða. Áður hafi aflinn verið mestur árið á undan. Hann segir að veiðin hafi verið tiltölulega jöfn en aflaaukningin á milli kvótaára á Gullver felist helst í auknum ufsaafla. Ufsaaflinn hafi verið um 500 tonnum meiri en kvótaárið á undan.  

Theodór Haraldsson, skipstjóri á Blængi, segir að veiðar skipsins hafi gengið vel á kvótaárinu sem var að líða og eins hafi vinnslan um borð í skipinu gengið ágætlega. Á Blængi er lögð áhersla á að veiða ufsa og karfa en á nýliðnu ári var veitt meira af ýsu en áður. Þá hafði það mikil áhrif að Blængur veiddi rúmlega 1.500 tonn af þorski í Barentshafinu á um 30 dögum í júní og júlí sl. Blængur hefur aldrei fiskað jafn mikið og á nýliðnu kvótaári.