mánudagur, 10. ágúst 2020
 
TölublöðVenjuleg útgáfa

Týnda síldin fundin

8. apríl 2014 kl. 07:34

Síld

Um 200 þúsund tonn mældust í Kolluál í síðustu viku.

Sá hluti stofns íslenskrar sumargotssíldar sem ekki skilaði sér í rannsóknum í fyrrahaust er fundinn út af Snæfellsnesi.

Vísbendingar bárust frá loðnuskipum fyrir um mánuði að síld væri að finna í Kolluál. Það var staðfest þegar Hafrannsóknastofnun mældi þar rúmlega 200 þúsund tonn í síðustu viku, að því er segir á vefnum mbl.is.  Þekkt er að síldin hafi áður haft vetursetu í Kolluál og á Látragrunni.

Guðmundur J. Óskarsson fiskifræðingur segir að ef þessi síld hefði ekki skilað sér hefði þurft að taka tillit til þess í stofnmati, sem hefði síðan leitt til ráðgjafar um minni veiði. Stofnmatið og veiðiráðgjöfin verði nú væntanlega í meiri takti við það sem verið hefur síðustu ár, að sögn Guðmundar.