mánudagur, 21. júní 2021
 
TölublöðVenjuleg útgáfa

Viðbúnaður vegna gangtruflana í flutningaskipi

14. janúar 2019 kl. 15:40

Landhelgisgæslan setti varðskip, þyrlu og björgunarskip Slysavarnafélagsins Landsbjargar á Suðurnesjum í viðbragðsstöðu. Mynd/LHG

Á þriðja tímanum í dag fékk stjórnstöð Landhelgisgæslunnar þær upplýsingar frá áhöfn skipsins að hætta á frekari gangtruflunum væri liðin hjá.

Landhelgisgæslan setti varðskip, þyrlu og björgunarskip Slysavarnafélagsins Landsbjargar á Suðurnesjum í viðbragðsstöðu laust eftir hádegi í dag vegna gangtruflana í 9000 tonna gámaflutningaskipi.

Þetta kemur fram í tilkynningu frá Landhelgisgæslunni. Þar segir jafnframt:

Skipið var þá statt úti fyrir Reykjanesskaga og var næst landi um fjórar sjómílur SSA af Reykjanestá. Landhelgisgæslan vildi hafa varann á því sem búist er við því að vindur snúist í suðvestanátt síðdegis. Áhöfn þyrlu Landhelgisgæslunnar beið í viðbragðsstöðu á Reykjavíkurflugvelli og varðskipið Þór sigldi þegar í stað í átt að gámaflutningaskipinu en varðskipið var statt við Suðausturland. Þá var varðskipið Týr gert tilbúið til að halda af stað frá Reykjavík.

Á þriðja tímanum í dag fékk stjórnstöð Landhelgisgæslunnar þær upplýsingar frá áhöfn skipsins að hætta á frekari gangtruflunum væri liðin hjá. Viðbúnaðarstig var þá lækkað. Skipið er nú komið fyrir Garðskaga og er væntanlegt til Reykjavíkur síðdegis.