sunnudagur, 25. ágúst 2019
 
TölublöðVenjuleg útgáfa

Ýmist mok eða bræla

23. febrúar 2015 kl. 12:14

Birtingur NK að veiðum á Lónsbugt á dögunum. (Mynd: Ólafur Óskar Stefánsson).

„Mikið að sjá á miðunum og full ástæða til bjartsýni ef veðrið verður almennilegt.“

Mokveiði var á loðnumiðunum á föstudagskvöld og á laugardaginn og má nefna að Börkur og Polar Amaroq stoppuðu einungis um sex tíma á miðunum áður en þeir héldu til lands með fullfermi. Engin veiði var hins vegar í gær vegna brælu en í morgun voru bátarnir byrjaðir að kasta og voru að fá góðan afla. 

Beitir  kom til löndunar í Neskaupstað síðdegis á laugardag með 1900 tonn, þarf af 700 til manneldisvinnslu. Tómas Kárason skipstjóri á Beiti segir á vef Síldarvinnslunnar að aflinn hefði fengist í 6-7 köstum og um væri að ræða stóra og góða loðnu. 

„Það var mikið að sjá á miðunum og full ástæða til bjartsýni ef veðrið verður almennilegt,“ sagði Tómas. „Við fengum aflann í Meðallandsbugtinni rétt vestan við Ingólfshöfða, en nú eftir bræluna skilst mér að allur flotinn sé á leið í Fjallasjóinn undan Eyjafjöllunum.“

 Nú er verið að frysta góða loðnu úr Berki í fiskiðjuverinu í Neskaupstað. Bæði er fryst á Japan og Rússland.