laugardagur, 16. janúar 2021
 
TölublöðVenjuleg útgáfa

Ýsustofninn með stærsta móti

18. desember 2019 kl. 16:24

Ýsa

Hafrannsóknastofnun hefur birt niðurstöður úr stofnmælingum botnfiska frá haustralli. Mælingarnar hafa verið framkvæmdar árlega síðan 1996, jafnan með sambærilegum hætti.

Greint er frá því að stofnvísitala þorsks hafi lækkað töluvert frá árinu 2017 og er nú svipuð því sem hún var árið 2012. Vísitalan 2017 mældist sú hæsta frá upphafi. Stofnvísitölur ýsu og ufsa lækkuðu einnig frá fyrra ári en höfðu farið hækkandi frá 2014.

Ennfremur segir í tilkynningu Hafrannsóknastofnunar:

„Vísitölur gullkarfa, skarkola og löngu eru háar miðað við árin fyrir aldamót. Vísitölur djúpkarfa, grálúðu, blálöngu og gulllax lækkuðu frá fyrra ári og eru nú undir  meðaltali  tímabilsins. Stofnar  hlýra, tindaskötu, sandkola  og  skrápflúru  eru  í sögulegu lágmarki.

Árgangar þorsks frá 2018 og 2019 eru nálægt meðalstærð. Árgangur ýsu frá 2018 mældist lélegur, en fyrstu vísbendingar um árganginn frá 2019 gefa til kynna að hann sé sá næst stærsti síðan 1996. Nýliðun gullkarfa, djúpkarfa og blálöngu hefur verið mjög léleg undanfarin ár. Vísitala nýliðunar hjá grálúðu hefur lækkað hratt frá hámarkinu árin 2009-2013.

Magn flestra brjóskfiska minnkaði frá fyrra ári og er nú um eða undir meðaltali rannsóknartímabilsins. Vísitölur margra annara djúpfiskategunda sem er að mestu að finna í hlýja sjónum suðvestur og vestur af landinu hækkuðu umtalsvert árin 2010-2015 en hafa í sumum tilfellum farið lækkandi undanfarin þrjú til fjögur ár. Almennt má segja að stofnvísitölur kaldsjávartegunda hafi lækkað yfir tímabilið. Hitastig sjávar við botn mældist að meðaltali hátt líkt og undanfarin ár.“