laugardagur, 19. júní 2021
 
TölublöðVenjuleg útgáfa

Ýsuvandræðin: Hundruð starfa sögð í húfi

28. janúar 2014 kl. 12:55

Smábátur á veiðum. (Mynd: Heiðar Marteinsson)

LS vill auka ýsukvótann strax en Hafró telur það ekki ráðlegt.

Landssamband smábátaeigenda krefst þess að ýsukvótinn verði tafarlaust aukinn um 5.000 tonn. Að öðrum kosti stöðvist bátarnir og hundruð manna missi vinnuna.

Þetta kom fram í máli Arnar Pálssonar framkvæmdastjóra LS á fundi í atvinnuveganefnd Alþingis í morgun með fulltrúum hagsmunaaðila í sjávarútvegi og talsmönnum Hafrannsóknastofnunar.  

„Við erum búnir að veiða okkar ýsu og bátarnir eru að stöðvast hver á fætur öðrum. Þetta veldur því að það er atvinnuleysi í landi. Ég spái því að það verði hundruð manna sem missa atvinnu sína og það er algjörlega vonlaust að kaupa eða fá leigðan ýsukvóta eins og staðan er í dag", sagði Örn í viðtali í hádegisfréttum RÚV.  

Björn Ævarr Steinarsson, forstöðumaður veiðiráðgjafasviðs Hafrannsóknastofnunar, benti á í viðtali við RÚV að núna séu á leiðinni fimm til sex lélegir árgangar af ýsu: „Þannig að það er alveg ljóst sama hvað við gerum að ýsuaflinn mun fara minnkandi á næstu árum og við teljum ekki ráðlegt að auka við aflann nú, það mun eingöngu leiða til þess að við munum þurfa að lækka aflamarkið enn hraðar heldur en ella í framtíðinni,“ sagði Björn Ævarr.